LAOAG CITY – Inpadanon ni Vice President Sara Duterte ti panawagan ti dati a Presidente Rodrigo Duterte kadagiti Pilipino a bantayan ti butosda para iti 2025 National and Local Elections.
Iti naminsan manen a panagsango kadagiti Pilipino iti ruar ti International Criminal Court (ICC) idiay The Hague, The Netherlands, inbatad ni Vice President Sara nga inbilin kenkuana ti dati a Presidente para kadagiti Pilipino a masapol a bantayan dagiti Pilipino dagiti butos ken siguradoen nga umiso ti agbalin a bilang dagiti butos para iti senatoriables.
Inlawlawagna a daytoy ket gapu ta adda dagiti indibidual a desperado ken ti pananggundaway laengen ti napanunot a wagas tapno mangabak.
Kabayatanna, inadmitir ni Vice President Sara a saanna a ninamnama nga iti intero a lubong ti agrambak iti maika-80 a panagkasangay ti dati a Presidente.
Mainaig iti daytoy, nagyaman ni Vice President Sara kadagiti Pilipino kadagiti nagduduma a paset iti intero a lubong a nangiyuswat ti panaguummong iti panagkasangay ti dati a Presidente.
