LAOAG CITY – Suportado ni Atty. Domingo “Egon” Cayosa, dati a Presidente ti Interated Bar of the Philippine (IBP) ti Department Circular ni Department of Justice Secretary Jesus Crispin Remulla a maibaba ti pyansa dagiti indigent person nga akusado.
Indsikribir ni Cayosa ti addang ni Remulla kas “move in the right direction” ken napintas ti kapanunutan ti sekretaryo.
Segun kenni Cayosa, rumbeng kuma nga idi pay laeng a naipatungpal daytoy ngem arig na ket nabaybay-an.
Inlawlawag na a ti proseso no matiliw ti maysa a marigrigat ket mabalod, agbirok ti abogado ken isu pay laeng ti panagpetisyon na a makissayan ti nairekomendar a pyansa gapo ta marigrigat daytoy no sadinno mangipakita ti Certificate of Indigency ken dadduma pay a pammaneknek.
Kalpasan daytoy, kunana a dumalan iti korte ken no mapaneknekan nga awan ti kabaelan na nga agbayad ti naituding a pyansa ket mapatgan met wenno ti maaw-awagan a “reduced bail”.
Inbatad na pay a no marigrigat ti natiliw ken makita met ti korte nga awan ti kabaelan na nga aglibas ken awan ti madi a rekord seknan iti panaglibas ket maipapaayan no dadduma ti “bail on recognizance” ken adda ti panangipasigurado ti abogado, kapitan ken dadduma pay a makapaneknek iti daytoy.
Kunana a ti problema iti daytoy, bayat ti petisyon ti maseknan iti korte ket nakabalod iti maseknan nangruna ket maysa kadagiti mapaspasamak ita ket naginad ti ti proseso gapo ta ado ti kaso.
Mainaig iti daytoy, inbatad na a ti inaramid ni Remulla ket short cut gapo ta no dadduma ket isun to met laeng ti mapasamak.
Mangnamnama met ni Cayosa a maipatungpal a dagus ti kalikagom ni Remulla.
