LAOAG CITY – Inlawlawag ni Atty. Ferdinand Topacio, legal counsel ni dati a Negros Oriental 3rd District Representative Arnolfo Teves Jr. a saan paylaeng a makarwar ti kliyente na iti pagbaludan gapu ta adda pay ti dua a nakapenpen a kaso na.
Naamoan a ti dua a nakapenpen a kaso ket adda ti pakainaigan iti sangsangwen ni Teves kas maipagarop nga utek iti pannakapapatay ni dati a Negros Oriental Governor Roel Degamo idi 2023.
Ni Teves ket immunan nga inabswelto ti korte iti maipagarop a pannakapapatay ni Miguel Lopez Dungog a dati a provincal board idi 2019.
Segun ken ni Topacio, basar iti ruling ti Manila Regional Trial Court Branch 15, pinatgan da ti inpila da a ”demurrer to evidence” ti dati a kongresista.
Kuna na a maipagarop nga inbatad pay ti korte a napaay ti prosekusyon a nangiwanwan ti prima facie case isut gapuna a naabswelto ni Teves.
Nupay kasta, basar iti Department of Justice (DOJ), awan pay ti naawat da nga opisyal a pammilin manipod iti korte.
Inpasingked met ti Department of Justice nga usaren da amin a legal remedies apaman a maawat ti prosecution panel ti opisyal a kopya manipod iti korte.
Kabayatanna, dakkel ti panagtalek ni Topacio a ti sumaruno a maibasura ket ti dua a nabatbati laengen a kaso ti dati a kongresista gapu ta mamati nga inar-aramid laeng daytoy ti gobierno.
