LAOAG CITY – Kinumpirmaran ni Ombudsman Jesus Crispin Remulla a saan pay a nabayadan agingga ita ni dati a Senador Bong Revilla ti P124.5 million civil liability nga inbilin ti Sandiganbayan.
Daytoy ket mainaig iti plunder ken graft cases-na nga adda ti pakainaiganna iti pork barrel scam.
Inbatad ni Remulla a nupay nakapiyansa ni Revilla ti maysa milyon a pisos iti agdama a kasona a malversation ket nagtalinaed latta ti responsibilidad daytoy nga isubli iti gobierno ti nasao a gatad kas civil damages.
Maipalagip nga idi 2018 ket nawaya-wayaan ni Revilla iti kasona a plunder ngem inbilin ti Sandiganbayan nga agbayad ti ₱124.5 milyon iti National Treasury.
Immuna iti daytoy, nakaruar iti pagbaludan ni Revilla kalpasan a pinalubosan ti Sandiganbayan a makapiyansa iti manarimaan a sangsangoenna a kaso a graft ken malversation mainaig iti maipagarup a maanomalya a P92.8 million flood control project idiay Pandi, Bulacan.
Inlawlawag ni Remulla a namnamaendan a palubosanda ni Revilla a makapiyansa ken inpettengna nga itultuloy ti Office of the Ombudsman ti amin a legal nga addang iti kaso.
Kuna met ti kampo ni dati a Senador Revilla a ti panangipalubos ti korte iti panagpiyansa ket pammaneknek a saan a napigsa ti ebidensia ti prosekusion kontra iti dati a Senador.
