LAOAG CITY – Kumpiansa ni dati a Sen. Antonio Trillanes IV ti inpilana a ‘plunder case’ kontra ken ni Vice President Sara Duterte iti Office of the Ombudsman.
Segun kenkuana, mamati daytoy a ti reklamo kontra iti Bise Presidente ket sakup dagiti elemento a kasapulan tapno mapaneknekan ti alegasion.
Inbatadna a supplemental wenno nayon daytoy iti immunan nga inpila ti civil society groups iti Ombudsman idi Disiembre iti napalabas a tawen.
Inlawlawagna a ti nagdumaan iti baro nga inpila a reklamo ket dagiti linaon ken dagiti alegasion wenno salaysay ni Ramil Madriaga a maipagarup a bagman ni Vice President Sara Duterte.
Gapu iti daytoy, mamati ti dati a Senador a ti naipila a ‘plunder case’ idi 2025 ken ita a 2026 ket mangitunda tapno maaddaan ti napigsa a kaso kontra iti Bise Presidente.
Inpettengna nga amin nga inpila ken insubmitir iti opisina ti Ombudsman ket ‘certified true copies’ dagiti opisial a dokumento.
Mainaig iti daytoy, iti maibagbaga a bagman ti Bise Presidente a ni Madriaga, kuna ni dati a Sen. Trillanes a nairamanen kadagiti ‘documentary evidence’ ditoy iti immunan a naipila a ‘plunder case’ idi Disiembre.
Patienna a nasken a napateg a mapagsungbat ni Vice President Sara Duterte kadagiti reklamo ken alegasion a sangsangoenna.
Inpaganetgetna a masapul a maammoan ti publiko ti sibubukel a kinapudno kadagiti inaramidna nangruna ket maikadua a kangatoan daytoy nga opisial ditoy pagilian.
Sumangsango ita ti Bise Presidente ti agsusukot a reklamo iti Office of the Ombudsman.
Karaman kadagitoy ket ti ‘graft ken malversation’ mainaig iti 650-milyon pisos ti confidential funds iti Office of the Vice President ken Department of Education.
Plunder ken malversation met mainaig iti 2.7-bilyon pisos a gatad ti maanomalya a confidential funds iti siudad ti Davao idi Mayor pay laeng daytoy.
Reklamo a graft ken malversation para iti ‘overpriced’ a laptops nga umabot iti balor a 8-bilyon pisos idi sekretario daytoy ti Department of Education.
Adda pay ti bribery, corruption ken dadduma pay a reklamo ti inpila ni dati a Sen. Trillanes ken sumagmamano a miembro manipud iti civil society group a ‘The Silent Majority.’
