LAOAG CITY – Inpetteng ni dati a Senador Leila de Lima a ni dati a Presidente Rodrigo Duterte ti mastermind iti extrajudicial killings (EJKs).
Inrakurak daytoy ni de Lima iti naiyuswat nga imbestigasyon ti House Committee on Human Rights seknan iti drug-related extrajudicial killings iti napalabas nga administrasyon.
Inpalgak na a ti drug war ket naimplementar kas opisyal a programa ti gobierno idi nakatugaw ni Duterte kas presidente iti pagilian.
Maipalagip a ni de Lima a napinget a kritiko ni Duterte ket nabalud ti sumagmamano a tawen sakbay a nawaya-wayaan gapu iti akusasyon kenkuana nga adda ti pannakainaig na iti illegal drugs.
Iti opening statement iti nasao a panagdengngeg, inbatad ni de Lima a ti drug war ti Duterte administration ket naipatungpal iti babaen ti Oplan Double Barrel ti Philippine National Police (PNP).
Inpaganetget ni de Lima a ti drug war ni Duterte ket nangrugi pay idi mayor idiay Davao City iti babaen ti binukel da a Davao Death Squad (DDS).
