LAOAG CITY – Inrakurak ni dati a TV Host Paolo Barba Bediones ti panagpaidasigna kas Mayor iti ili ti San Nicolas para iti 2025 Midterm Elections.
Segun kenkuana, pormalen a nagpa-reactivate ti voter’s registration-na iti Commission on Election Office iti nasao nga ili.
Inbatadna nga adda ti pannakisarsaritana iti pamiliana maipanggep iti daytoy a banag isu a nagdesisionda nga agpailayon kas Mayor iti ili ti San Nicolas.
Inlawlawagna a sakbay a naan-anay a nagdesision ket inleppasna pay laeng dagiti responsibilidadna iti showbusiness ken kas maysa a Broadcast Journalist.
Kunana a nagadal daytoy iti Master’s Degree para iti Entrepreneurship iti Asian Institute of Management.
Mainaig iti daytoy, addan ti immun-una a panagsasaritada ken ni Presidente Ferdinand “Bongbong” Marcos Jr. ken ti ulitegna a ni Ilocos Norte 2nd District Representative Angelo Marcos Barba pakaseknan iti panagpaidasigna kas Mayor.
Inpakaammona nga adda ti maiyuswat a taripnong kaduana da Senador Imee Marcos ken Gov. Matthew Marcos Manotoc para kadagiti sumarsaruno a plano nga aramidenda.
Innayonna a dagiti kangrunaan nga ipangpangrunana apaman a makatugaw iti puesto ket iti benneg ti edukasion, salun-at, isports ken dadduma pay.
Kabayatanna, naammoan a ni Bediones ket kaanakan ni Pres. Marcos Jr. ken lolana ni Fortuna Marcos Barba a kabsat ni dati a Pres. Ferdinand Marcos Sr.
Immuna iti daytoy, nag-courtesy call ni Bediones ken ni Acting Mayor Napoleon Hernando iti ili ti San Nicolas.
