LAOAG CITY – Inlawlawag ni Atty. Bernie Constantino, ti dati nga Integrated Bar of the Philippines (IBP) – Laoag City, Ilocos Norte Chapter a ti extradition treaty ket paset ti international Law, katulagadan wenno kontrata iti dua a nasyon kas koma iti Pilipinas ken Amerika.
Naipalaon iti nasao a linteg a no adda ti tao a nakaaramid ti krimen idiay Estados Unidos ken umay ditoy Pilipinas ket saan a mabalin a basta tiliwen dagiti otoridad iti baet nga adda ti kaso a naipila idiay Amerika ken naiparuk-atanen ti warrant of arrest.
Nupay kasta, inbatad na a gapu iti extradition treaty ket adda ti obligasyon ti Pilipinas a no kiddawen ti gobierno ti Amerika a makikoordinar ti pagilyan ket isuko ti maseknan.
Basar ken ni Constantino, mabalin a pastreken dagiti otoridad manipud Amerika tapno isuda a mismo ti umay mangtiliw iti maseknan.
Ti nagbalin a rakurak ni Atty. Constantino ket adda pakainaigan ti immunan a report a mabalin nga agbalin a kumplikado no maiyuswat ti extradition ken ni Pastor Apollo Quiboloy, ti maaw-awagan kas “appointed Son of God” ti Kingdom of Jesus Christ kalpasan a nairaman iti wanted list ti Federal Bureau of Investigation (FBI) gapu iti kaso na nga human ken sex trafficking.
