LAOAG CITY – Inyestoria ni Mrs. Cherry Garma, dati nga Information Officer ti Department of Education – Schools Division Office ditoy siudad ti Laoag nga awan ti napuotanna a nagannak kenkuana nga adda iti denna daytoy kabayatan ti panagdakkelna.
Inbatadna a maladaga pay laeng isuna ket inbatida daytoyen kadagiti lolo ken lolana nga isuda ti nangtarabay kenkuana agingga a dimmakkel ken naaddaan ti nakem.
Kunana a Grade 3 pay laeng isuna ket agaw-awat daytoyen ti labada tapno masupusupan dagiti kangrunaan a kasapulanna iti panagadal ken adda ti paggatangna iti taraon.
Inlawlawagna a no asino ti mangala kenkuana ket isu ti pagtarusanna gapu ta awan ti makasango a mangaywan kenkuana.
Mainaig iti daytoy, kunana a gapu ta awan ti sabali a mabalin a pagkamanganna wenno kasarsaritana ket nakadaywanna ti agsurat iti diary no sadinno ditoyna nga isursurat dagiti amin a mapaspasamak iti biagna.
Babaen iti kinalaingna ti panagsurat ket ditoy a naasa ti abilidadna iti panagsurat kadagiti damdamag agingga a nagbalin daytoy nga Information Officer iti maysa a government news agency.
Inpalgakna a basar iti estoria ti lolo ken lolana ket inbatida isuna tapno mapan agbirok ti pagtrabahoan dagiti nagannak kenkuana idiay Manila.
Nupay kasta, saan nga alisto a nakasapol ti trabaho dagiti nagannak kenkuana isu nga arig a nabaybay-an isuna idi ubing gapu ta awan ti nangbayabay kenkuana a nagannak.
Inpannakkelna nga iti baet ti kinarigat ti pannubok a napasaranna ket saan a nagbalin daytoy a lapped tapno saan a makaadal isu a sinerrekna pay ti panagkatulong tapno adda ti pagkautanna kadagiti gastosenna.
Kabayatanna, naammoan a nakita laeng ni Mrs. Garma ti nagannak kenkuana kalpasan ti 25 a tawen.
