LAOAG CITY – Arigna saanen a nakigtot ni dati nga U.S. President Barack Obama iti maipagarop a kaawan ti babain ken decorum iti political discourse iti Amerika kalpasan a rimuar ti maysa a kontrobersyal a video iti social media account ni U.S. President Donald Trump.
Iti maysa a podcast interview karaman ti political commentator a ni Brian Tyler Cohen, sinungbatan ni Obama ti video nga inburay ti Truth Social ni Trump idi Pebrero 5 ita a tawen no sadinno a makita a naikabil ti ladawan da ken ni dati a first lady Michelle Obama iti bagi dagiti sunggo iti maysa nga ababa a paset ti clip.
Ti nasao a video, a naglaon pay kadagiti conspiracy claims mainaig iti 2020 election, ket dagus a nakagun-od ti ado a pammabalaw manipod iti nagduduma a paset ti US political spectrum.
Immunan nga inawagan ti White House a “fake outrage” sakbay nga inbatad da a naipost daytoy gapu iti panagkamali ti maysa nga staff member nga iti saan a nagbayag ket naikkat.
Kabayatanna, immuna metten nga inrakurak ni Trump a saanna a nakita ti nasao nga offensive clip, ngem nagtalinaed ti takder na kadagiti rakurak iti video mainaig iti maipagarop nga election fraud idi 2020 kontra ken ni Joe Biden.
