LAOAG CITY – Natiliw ti maysa a lalaki kalpasan a nagtakaw iti dakkel a mall iti ili ti San Nicolas.
Nabigbig ti suspek a ni Rey Sabado y Pasual, agtawen ti 19, awanan ti asawa, maysa a kargador ken taga Brgy. Tadima Letre, Malabon City.
Basar ti palawag ni Sabado, inmay laeng nagpasyar ditoy probinsya ken bayat ti panagawid na iti lugar da ket adda ti nangisit a van a nangpick-up kenkuana, ken maipagarop nga innala da iti cellphone na.
Gapu ti daytoy, kunana a napilitan nga inaramid na ti napan nagtakaw iti uneg ti dakkel a mall.
Segun kenni Police Senior Master Sgt. Jeniffer Tacla, ti inbestigador ti PNP-San Nicolas, nakita iti CCTV footage ti lalaki nga agikarkarga kadagiti items iti bag na.
Mainaig ti daytoy, bayat ti iru-ruwar ti suspek iti Mall ket in-hold dagiti maseknan ken kinumpiskar da dagiti sumagmamano a multi-vitamins, shampoo, ecobags, lotion, sabon ken dadduma pay nga agdagup ti nasurok 10 ribo a pisos ti balor na.
Atapen ti PNP a datin a modus operandi ti suspek ti agtakaw ken saan da a kumbinsido ti palawag ti suspek.
Iti agdama, nagtalinaed iti kustudyar ti PNP San Nicolas ti nasao a suspek ken mapilaan ti kaso.
