LAOAG CITY – Inrakurak ti Estados Unidos ti umuna a panagwaras ti makapatay nga H7N9 bird flu iti maysa a poultry farm sipod idi 2017.
Naduktalan ti virus iti maysa a poultry farm ti 47,654 a manok idiay Noxubee, Mississippi basar iti World Animal Health Organization.
Rinugianen ti panangpatay kadagiti naapektaran a manok kabayatan a mangiwaywayat ti naun-uneg nga imbestigasion dagiti otoridad.
Nakaro a nakaptan ti avian influenza dagiti poultry farm iti intero a lubong a nangitunda ti panagngato ti presio ti taraon ken pagam-amkan iti baro a pandemia.
Naammoan a ti H5N1 strain ti dakkel ti epektona kadagiti naglabas a tawen a nangitunda ti impeksion ken pannakatay ti tao.
Nupay kasta, ad-adda a makapatay ti H7N9 nga addaan ti agarup 40% fatality rate kadagiti nairekord a kaso sipod idi 2013 basar iti World Health Organization.
Mangipatpatungpal dagiti otoridad idiay Estados Unidos ti naig-iget a panagbantay tapno malappedan ti panagawaras ti nasao a virus.
