LAOAG CITY – Nagballaag ti Department of Health (DOH) iti publiko kontra iti panagngato ti kaso ti influenza-like illnesses (ILI), dengue ken leptospirosis gapu iti panagtudo, shear line, Intertropical Convergence Zone (ITCZ) ken easterlies.
Naammoan nga uray bimmaba ti 50% ti influenza-like illnesses cases manipud iti 21,340 idi 2024 iti 9,995 ita a 2025, ngimmato daytoy iti 5,150 a kaso manipud idi Enero 5-18 maidasig iti 2,388 idi Disiembre 22 agingga idi Enero 4.
Nakikoordinaren ti Department of Health kadagiti international health organizations tapno tingitingen no sakupen pay laeng daytoy ti seasonal flu trends.
Ngimmato met ti 40% ti dengue cases a dumanon iti 28,234 idi Pebrero 1 idinto a 8% met ti nagngatoan ti leptospirosis cases nga adda iti 422 a kaso.
Ginutigot ni Department of Health Secretary Teodoro Herbosa ti publiko nga agpakonsultar nga insigida iti doktor no adda ti sintomas ti gurigor, uyek, panagsakit ti bagi ken dadduma pay tapno maliklikan ti komplikasion.
