LAOAG CITY – Inbatad ni Mr. Victor Dabalos, ti mangidadaulo ti Provincial Government of Ilocos Norte – Department of Environment and Natural Resources a saan a mapalubusan nga agoperar ti Paoay Lake Water Park no awan ti maiyuswat a water testing.
Segun kenkuana, kalikagum ti DENR a maipasigurado a nadalus ken natalged ti danum a paglalanguyan ken pagdidigusan dagiti tattao tapno maliklikan ti aniaman a sakit a possible a mapasaran dagiti maseknan iti panagturong da iti nasao a water park.
Inbatadna a naobserbaranda nga adda ti paset ti danom a nalibeg isut gapuna a masapol a maalaan ti sample ti tapno maipatulod iti laboratoryo a mangduktal no kasano ti kinadalus ti danum ti water park.
Inlawlawagna a masapol a saan a nasursurok ngem 100 MPN wenno Most Probable Number ti rumuar a resulta iti pannakaipadalan ti sample iti water testing.
Kunana a no nasursurok ngem 100 MPN ket mangipasimudaag a narugit ti danum ti water park a possible a makaitunda ti pannakaitantan ti naiyiskedyul nga aldaw a pormal a pannakalukat ti nasao a lugar.
Inlawlawag ni Dabalos a napateg a dumalan iti water testing ti water park tapno maiyadayo iti risgo dagiti mapan agdidigus.
Gapu iti daytoy, kuna na a kasapulan a maiyuray nga umuna ti resulta ti naala a water sample sakbay a mangrugi ti operasyon ti baro a tourist attraction ditoy probinsia.
Mainaig iti daytoy, kunana a nakaala ken nalpas metten ti Provincial Tourism Office dagiti kasapulan a requirements tapno makaala ti permit ti water testing no sadino a manamnama a maiyuswat iti sumaruno a lawas babaen kadagiti eksperto manipod iti Environmental Management Bureau – Regional Office.
Kabayatanna, iti eksklusibo nga interview ti Bombo Radyo Laoag ken ni DENR Secretary Roy Cimatu ket naibaga na a masapol a maiyuswat ti water testing iti Paoay Lake Water Park iti kabiitan a panawen tapno saan a masalungasing ti Philippine Clean Water Act of 2004 a naiget nga ipatpatungpal na.
