LAOAG CITY – Kalikagom ni DENR Sec. Roy Cimatu a maaddaan ti bukod a sanitary landfill iti kada ili ken ciudad ditoy probinsya.
Inrakurak daytoy ti sekretaryo kabayatan ti pannakitaripnong na kadagiti amin a mayor ditoy probinsya ken ditoy pay naibinsa-binsa dagiti kangrunaan a problema mainaig iti aglawlaw.
Gagem ni Cimatu nga agbalin a kaunaan ti probinsya nga Ilocos Norte nga addaan ti sanitary landfill iti kada ili ken ciudad.
Mainaig iti daytoy, inpanamnama met dagiti mayor a tungpalen da ti kalikagom ni Cimatu a maaddaan da ti bukod a sanitary landfill ken agbalin a wagas ti sekretaryo tapno mapaalisto ti pannakaipatungpal daytoy.
Naamoan a dagiti ili nga adaan pay laeng ti bukod a sanitary landfill ket ti Bacarra, Banna, Nueva Era, Paoay, Piddig, San Nicolas ken Vintar idinto a dagiti manarimaan ti pannaka-konstruksyon na ket ti ili ti Bangui, Dingras ken Sarrat.
Malaksid kadagiti mamayor ket adda pay dagiti dadduma nga opisyal ditoy probinsya a nagatendar iti taripnong, pakairamanan ni Governor Matthew Marcos-Manotoc.
