LAOAG CITY – Kinondenar ti Department of Education (DepEd) ti korapsyon iti procurement activities na ken nagkari ti “transparency” iti liderato ni Secretary Sonny Angara iti ahensya.
Iti abiso, inpasigurado ti Department of Education nga agtungpal iti Republic Act 9184 wenno ti Government Procurement Reform Act tapno masigurado a patas ti maipaay nga oportunidad para iti amin a bidders ken levels, manipod iti central office agingga kadagiti pampubliko a pagadalan iti intero a pagilian.
Saan a dinakamat ti Department of Education ti konteksto ti panagiparuk-at ti abiso ngem nagballaag daytoy a siasinno man nga indibidual a masentensyaan a guilty iti corrupt practices ket sumango iti maiyannatop a pannusa, karaman ti blacklisting ken criminal charges.
Ginutigot ti Department of Education ti publiko nga ireport ti aniaman a mapagduduwaan nga aktibidad kadagiti pagadalan iti walangkorapsyon@deped.gov.ph.
Opisyal a nagtugaw ni Angara kas mangidaulo iti Education Department idi Hulyo ita a tawen kalpasan ti panagbaba iti pwesto ni Vice President Sara Duterte.
Iti agdama ket manarimaan ti panangiwayat ti House good government and public accountability committee ti motu proprio inquiry mainaig iti panagpalyar ti Department of Education a nangibunong kadagiti computer units iti nasayaat a kondisyon ken dadduma pay nga isyu iti panagusar ti budget ti ahensya iti termino ni Duterte.
