LAOAG CITY – Linuktan ti Department of Education (DepEd) ti aplikasion para iti Senior High School Voucher Program para iti school year 2024-2025.
Iti sidong ti nadakamat a programa, makaawat dagiti kualipikado nga estudiante iti senior high iti subsidy babaen ti voucher.
Mainaig iti daytoy ket gutgotigoten ti ahensya dagiti kualipikado a voucher applicants nga isubmitirda ti aplikasionda online babaen ti Online Voucher Application Portal (OVAP).
Segun iti Department of Education, ti deadline ti Online Voucher Application Portal ket inton Hunio 2 iti daytoy a tawen, bayat a Hunio 4, 2024 met ti deadline ti panagisubmitir kadagiti kasapulan a dokumento ken aplikasion.
Mairuar inton Hulio 12 ti resulta ti aplikasion ken ti panangrugi ti pannakaipaulog ti qualified voucher applicant (QVA) certificate.
Gapu iti daytoy ket impaganetget ti Department of Education a maited laeng ti kastoy a sertipikasion agingga iti Setiembre 13, ti agdama a tawen.
Kabayatanna, impalagip ti Department of Education a saan a kasapulan nga agaplikar dagiti qualified students para iti voucher pakairamanan dagiti estudiante a sumrek iti Grade 11 inton sumaruno a school year a nakaturpos iti Grade 10 iti daytoy a School Year 2024-2025 kadagiti public ken private schools a karaman kadagiti Education Service Contracting grantees.
Dagiti estudiante a nagturpos iti haiskul idi 2015 wenno immun-una a tawen, dagiti incoming Grade 12 learners a saan a paset ti SHS VP idi Grade 11 ken dagiti saan a Filipino nga estudiante ket saan a maikari iti kasta a voucher program.
