LAOAG CITY – Nagpalagip manen ni Atty. Donato Balderas, ti Schools Division Supt iti Department of Education – Ilocos Norte mainaig iti “No Collection Policy” para iti mapaspasangasangan a Graduation wenno Moving Up Ceremony.
Inlawlawag ni Balderas a saan a kasapulan nga adda ti kontribusyon a makolektar kadagiti nagannak nga agpaturpos ti anakna gapu ta dagiti usaren a medal ken certificate ket maala iti Maintenance and Other Operating Expenses (MOOE).
Kuna na a dagiti pagadalan a basbassit ti populasyon na ket basbassit met ti Maintenance and Other Operating Expenses na isut gapuna a no awan ti makaumanay nga usaren da a paggatang kadagiti mausar iti Graduation wenno Moving Up Ceremony ket masapol a boluntaryo laeng dagiti nagannak a tumulong.
Inpaganetget ni Atty. Balderas a ti agpannuray iti pannakaiwayat ti Graduation wenno Moving Up Ceremony ket ti austerity measure a kayatna a sawen ket saan a kasapulan a nagarbo laketdi napintas ken naannayas ti pannakaiwanwan ti programa.
Mainaig iti daytoy, kuna ti opisyal a masapol a ti kangrunaan a katulungan da koma iti naiget a pannakaipatungpal ti “No Collection Policy” ket dagiti school head wenno principal tapno awanen dagiti tumaod a reklamo seknan iti nasao nga isyu.
