LAOAG CITY – Inbilin ti Department of Health (DOH) iti amin nga ospital ti gobyerno ken health facilities ti panang-reactivate iti dengue fast lanes iti baet ti agtultuloy a panagngato ti kaso ti dengue iti intero a pagilian.
Daytoy ket tapnp masigurado iti alisto a triage, panang-diagnose ken panangagas kadagiti maipagarop a kaso ti dengue.
Inrakurak met dagiti health department nga addan ti nakasagana a rinibo a dengue kits nga usaren dagiti lokal a gobierno.
Iti agdama, maibasar iti datos ti Department of Health manipod iti Enero 1 agingga iti Pebrero ita a tawen ket addan ti nairekord a pakabuklan a 43,732 dengue cases, ngimmato daytoy iti 56% manipod kadagiti nairekord a kaso iti isumet laeng a panawen idi 2024.
Kabayatanna, ginutigot ti Department of Health dagiti lokal a gobierno a mangipatungpal ti amin a kasapulan a preventive measures tapno malabanan ti panagwaras ti sakit kas ti panangisayangkat ti clean-up drives tapno mabirukan ken maparmek dagiti pagum-umukan dagiti lamok ken panangipatungpal ti fogging kadagiti hostpot area nga addaan ti nangato a kaso ti dengue.
