LAOAG CITY – Awan pay ti pormal a naawat a reklamo ni Department of Education Schools Division Superintendent ti Ilocos Norte Dr. Joann Corpuz pakaseknan iti mairekreklamo kontra iti Presidente ti Non-Teaching Staff a ni Ma. Filomena Caldito.
Daytoy ket kalpasan a maipagarup a nagbayad dagiti nasurok 400 a tattao ken ni Caldito para iti t-shirt nga idi pay laeng Disyembre itay napan a tawen.
Segun kenni Dr. Corpuz, nasaysayaat nga agsarita pay laeng dagiti maseknan iti nasao a banag tapno saan a maipangaton iti Division Office daytoy nga isyu.
Nupay kasta, kunana a no man adda ti mapaneknekan a nagbasol ket adda ti maiyannatop a pannusa na ngem nakadepende daytoy no anya ti linabsing na.
Inbatad na a saan na pay nga ammo dagiti mabalin a maipataw a reklamo kontra ken ni Caldito gapu ta awan met pay ti naawat na a reklamo.
Inlawlawag na a sipod idi nagtugaw kas Schools Division Superintendent ti Ilocos Norte ket awan met pay ti naammoan na a nakaidamdamagan ni Caldito.
Kabayatanna, ikarkarigatan met ti Bombo Radyo Laoag a maalaan ti komento ni Caldito seknan iti daytoy.
