LAOAG CITY – Mamati ni Atty. Donato Balderas Jr. iti Schools Division Superintendent iti Department of Education – Ilocos Norte a responsibilidad iti Local Chief Executive iti ili ti Sarrat iti mangipaay ti pinansial a suporta kadagiti Mathletes manipod iti Sarrat National High School uray awan iti pammalubos manipod iti Department of Education.
Daytoy ti nagbalin a sungbatna kalpasan nga inbatad ni Mayor Remigio Medrano iti ili ti Sarrat a ti maysa kadagiti pakaseknanda ket iti saan a pannakaipaay iti naan-anay a suporta kadagiti nasao nga estudiante gapu ta awan iti makitada a pammalubos manipod nasao a departamento a mabalinda iti agdawat iti tulong.
Inlawlawag ni Balderas a no maipapan iti panagkiddaw ti tulong iti gobierno probinsial ket daytoy mismo ti agsurat ken ni Gov. Matthew Marcos Manotoc.
Inpalgakna a maipanggep ken ni Mayor Medrano a maibilang kas Chairman iti Local School Board ket rumbeng a patganda iti kiddaw dagiti agad-adal uray awan iti pammalubos ti Department of Education gapu ta sakupenda met dagiti nasao nga estudiante iti ili nga idadauloanna nangruna ket naaprobaranen iti travel dagiti estudiante manipod iti Department of Education Region 1 a pammaneknek a pudno iti panagkiddawda iti tulong pinansial.
Nupay kasta, inpetteng ni Balderas a no isu ti kasapulan ti Mayor ket isu ti aramidenda ken nalaka laeng nga aramiden daytoy.
Maipalagip nga iti grupo ti Sarrat National High School ket manamnama nga agturong idiay Macao, China inton Marso 15 agingga 18 ita a tawen para iti final round iti World International Mathematical Olympiad.
