LAOAG CITY – Inpakaammo ni Atty. Donato Balderas Jr., Schools Division Superintendent ditoy Ilocos Norte nga adda ti agarup 300 a report ti naawatda a mangibagbaga a kabaelanda nga irugi ti klase inton Lunes, Hulio 29.
Segun kenkuana, adda met ti naawatda nga 60 a report a mangibagbaga nga alanganen a maikamakamda ti panangrugi ti panaglukat ti klase.
Nupay kasta, inbatadna a basar iti naawatna a rason ket saan met a seryoso unay ti napasaran a situasion dagiti maseknan a pagadalan.
Gapu iti daytoy, mangnamnama ni Atty. Balderas nga aggigiddan met laeng dagiti amin a pagadalan iti panangipatungpal ti panaglukat ti klase.
Mainaig iti daytoy, kunana nga ita nga aldaw ti maudi a pannakaisayangkat ti Brigada Eskwela ngem gapu iti napasaran a nakaro a layus gubuay iti iduduprak ti Super Typhoon Carina ket naitantan ti pannakadalus kadagiti pagadalan.
Inbatadna nga adda met ti naawatna pay a report maipanggep kadagiti klasrum a naserrek ti danum gapu iti layus nga intunda ti napigsa a tudo.
Innayonna nga adda ti isagsaganada nga asynchronous materials no bilang adda ti mapasamak a pannakasuspinde ti in person class tapno saan a masayang ti panawen iti panagbasa dagiti agad-adal.
