LAOAG CITY – Immanamong ti Department of Education iti dagus a pannakaisubli iti old calendar no sadinno a ti klase ket manipod iti Hunyo agingga iti Marso no sadinno a ti Abril ken Mayo ket isu ti bakasyon.
Inaramid daytoy ti Department of Education kalpasan ti naiyuswat a panagdengngeg iti Senate Basic Education Committee iti panangidaulo ni Sen. Win Gatchalian.
Segun ken ni Assistant Secretary Francis Bringas, naisumitiren ti ahensiya iti opisina ni Presidente Ferdinand Marcos Jr. ti plano nga adjustment iti school year 2024-2025 ken ti pannakaisubli ti serrek iti pagadalan intono Hunyo 2025.
Daytoy ket kapada metlaeng ti insumitir a gakat ti Teachers’ Dignity Coalition (TDC) iti Department of Education nga inrakurak ni Teachers’ Dignity Coalition Chair Benjo Basas iti nasao a panagdengngeg.
Para iti Teachers’ Dignity Coalition, maipatungpal ti pannakaisubli ti serrek iti pagadalan intono Hunyo 2025 no maisapsapa ti panagleppas ti School Year 2024-2025.
Innayon ni Basas nga imbes a Mayo 16, 2025 ket masapol nga ileppas agingga iti Abril 11.
Naragasakan met ni Basas iti nagbalin a sungbat ti Department of Education gapu ta manipod iti Mayo 16 nga orihinal a plano ket maileppas ti School Year 2024-2025 ti Marso ken addaan laeng ti 165 nga aldaw a panageskwela dagiti agad-adal.
Nupay saan pay a pinal daytoy ken maiyur-uray paylaeng ti panangpatibker ni Presidente Marcos ket nagyaman ti Teachers’ Dignity Coalition gapu ta dinengngeg ti Department of Education ti arungaing dagiti nagannak, agad-adal ken dagiti mangisursuro.
