LAOAG CITY – Inaprubaran ti Department of Education (DepEd) ti uppat nga aldaw a workweek para iti non-teaching personnel nga agtrabaho onsite iti kada lawas.
Iti inparuk-at a memorandum ni Education Secretary Sonny Angara, maibilang ti aldaw ti Biyernes kas naipagagangay a work-from-home day para iti amin a sakupen ti pagannurutan.
Daytoy ket kalpasan ti direktiba ni Presidente Ferdinand Marcos Jr. a mangipatungpal ti energy conservation measures iti amin nga opisina ti gobierno gapu iti ngumatngato a presyo ti langis mainaig iti tension iti Middle East.
Ti nasao a pagannurutan ket sakupen na dagiti non-teaching ken related-teaching personnel, karaman dagiti contract-of-service ken job order employees, idinto a ti dadduma a mangisursuro ket agtultuloy ti regular a klase da ken dadduma pay nga aktibidad.
Kagiddan ti uppat nga aldaw nga onsite arrangement, inbilin met ti Department of Education dagiti addang a panaginot ti enerhiya tapno makissayan ti makonsumo ti kuryente ken gasoline ti 10% agingga iti 20%.
Karaman ditoy ti panangikabil ti aircon iti 24°C, panagusar ti sleep mode iti kagamitan, panangiddep ti silaw ken electronics a saan a kasapulan tunggal lunch break ken kalpasan ti panangopisina ken panagusar ti agdan imbes nga elevator.
Inmandar pay ti Department of Education a dagiti inter-agency meetings, konsultasyon, ken conference ket aramiden iti virtual platform malaksid no kasapulan,ken dagiti official travel ket limitado laeng iti napapateg wenno kritikal a trabaho no saan a kabaelan iti online meeting.
