LAOAG CITY – Inlawlawag ti Department of Education (DepEd) ti naikeddeng a transisyon maiturong iti trimester school calendar mangrugi iti school year 2026-2027.
Iti statement, inlawlawag ti Education Department a gagem daytoy a reporma nga agtultuloy ti panagadal ken makissayan ti masansan a kaawan ti klase.
Inaramid daytoy ti ahensiya kalpasan ti kritisimo manipod iti education groups.
Nupay kasta, segun iti Department of Education, nakabasar ti pagannurutan iti naisayangkat a nalawa a konsultasyon iti nagduduma a lebel manipod kadagiti mangisursuro, lider ti pagadalan, dagiti nagannak, agad-adal agingga kadagiti mangibagi ti pampubliko ken pribado a sektor ti edukasyon.
Dinakamat pay ti ahensya ti finding a mangipakpakita nga umabot agingga iti 53 manipod iti 180 nga aldaw ti serrek idi School Year 2023-2024 wenno katukad ti tallo a bolan a panageskwela ti napuka gapu iti dakes a panawen ken dadduma pay nga aktibidad a saan a karaman iti panagisuro.
Tapno masolusyunan daytoy ket nagudwa ti baro nga school calendar iti structured blocks karaman ti opening block para iti umuna a term para iti learner profiling ken dagiti administratibo a panagsagsagana; naat-atiddog nga Instructional Blocks para iti agtultuloy a panagisuro ken panagadal, ken End-of-Term Blocks para iti academic intervention, professional development kasta pay para iti wellness dagiti mangisursuro ken agad-adal.
Inlawlawag pay ti Department of Education a paset ti three-term calendar ti ad-adda a napalawa a programa tapno urnusen ti pagibasaran iti edukasyon iti pagilian karaman ti panagipatakder kadagiti classrooms, pannakaipalawa ti school-based feeding program, pannakapaiget ti literacy ken learning recovery interventions, ken dadduma pay.
