LAOAG CITY – Nagballaag ti Department of Education (DepEd) dagiti opisial ken agpapaay kadagiti pagadalan a maipawil ti aniaman a klase ti political campaign iti umas-asideg a graduation ken moving-up ceremonies dagiti agad-adal.
Iti Memorandum Order a pinirmaan ni Education Secretary Sonny Angara, naipaganetget ti kinapateg ti panagpatalinaed ti propesionalismo iti sektor ti edukasion nangruna iti mapaspasangasangan a 2025 National and Local Elections.
Nagpalagip pay ti Department of Education a dagiti seremonya ket nasken nga agbalin a simple ngem adda ti kaipapananna.
Naiget pay a maipawil ti panagkolektar ti bayad wenno kontribusion manipud kadagiti agad-adal ken dagiti nagannak.
Kabayatanna, ti End-of-School-Year Rites para iti Kindergarten, Grade 6, Grade 10, Grade 12 ken Alternative Learning System ket naikeddeng a maiyuswat inton Abril 14 ken 15.
