LAOAG CITY – Plano ti Department of Education (DepEd) nga ipatungpal ti ‘One principal-one school’ policy kalpasan a naduktalan iti report ti Second Congressional Commission on Education (EDCOM II) nga adda ti agarop 25 a ribo a pampubliko a pagadalan ti awan principal na.
Segun ken ni Education Secretary Sonny Angara, ilungalong da ti promosyon ken reclassification dagiti Head Teacher ken Teacher-in-Charge kas pormal a principal.
Kuna na a nabaliwan metten ti pagannurutan tapno masigurado a kada pagadalan ket maaddaan ti bukod a principal.
Magiyuswat pay ti inspeksyon ti Department of Education iti distribusyon kadagiti kwalipikado a principal iti nagduduma a rehiyon tapno masolusyunan ti panagkurkurang na iti sumagmamano a lugar.
Siguradwen pay ti Department of Education ti patas a reallocation dagiti principal tapno saan a matambakan ti maysa a rehiyon bayat nga agkurkurang ti dadduma.
Ad-adalen pay ti Department of Education ti masansan a pannakaiyuswat ti eksaminasyon ken pannakapalawa ti training programs para kadagiti agkalikagom nga agbalin a principal.
