LAOAG CITY – Inpetteng ni Manila 2nd District Rep. Ronaldo Valeriano a kasapulan nga iwayat ti nalawa a reporma iti sibubukel a Philippine National Police (PNP) manipud iti precinct level agingga iti national headquarters.
Mensahe daytoy ni Valeriano kalpasan a pinatibker ti Korte Suprema iti kallabes ti desision kontra kadagiti pulis a karaman iti panangpapatay ken ni Kian Loyd Delos Santos a napasamak iti babaen ti implementasion ti war on drugs.
Inbatadna a kangrunaan a nasken a tuldukan ti Philippine National Police ti pannakapaay a mapagsungbat dagiti abusado nga opisial daytoy tapno saanen a maulit ti pannakatay ti maysa a kapada ni Kian Delos Santos iti ima dagiti pannakabagi ti linteg.
Kunana nga adu dagiti abusado nga opisial ti nailian a pulisia ti agserserbi kadagiti nabibileg iti pagilian.
Inlawlawagna a pammaneknek daytoy ti pannakairamanda iti panagrames ken panangpapatay kadagiti sibilian kas iti kaso dagiti mapukpukaw a mammallot.
Mamati ni Valeriano nga idauluan ni Department of the Interior and Local Government Secretary Jonvic Remulla ken ti National Police Commission (NAPOLCOM) ti naan-anay a pannakadalus iti nailian a pulisia.
