LAOAG CITY – Inbatad ti Department of Foreign Affairs (DFA) nga awan ti Pilipino a natay wenno nadangran iti inyuswat nga airstrikes ti India iti Pakistan a nakatayan ti nasurok a 26 a sibilyan.
Kinumpirmaran pay ti Embahada ti Pilipinas iti Islamabad a natalged dagiti Pilipino kadagiti apektado a lugar.
Basar iti Department of Foreign Affairs, agtultuloy a banbantayan da ti sitwasyon iti nagbaetan ti India ken Pakistan, ken nagpanawagan ti nainkapyaan a resolusyon iti susik ti dua a pagilian.
Binalakadan met ti embahada dagiti Pilipino a liklikan ti agturong iti paset ti Bhimber City, Azad Kashmir, Sialkot Line of Control, ken dagiti lugar a lima a milya manipod iti border ti India ken Pakistan.
Inpasigurado pay ni Department of Foreign Affairs spokesperson Ma. Teresita Daza nga awan ti Pilipino iti Bhimber ken Azad Kashmir.
Iti rekord ti ahensya, adda ti 3,151 a Pilipino nga adda idiay Pakistan, karaman ti sumuruk-kumurang a 30 a Pinoy iti Sialkot, nga asideg iti Jammu border ken kaadoan kadagitoy ket addaan ti asawa wenno pamilya a Pakistani.
Kabayatanna, mapatta-patta nga adda met ti 3,350 Pilipino idiay India.
