LAOAG CITY – Inpetteng ti Department of Foreign Affairs (DFA) a saan laeng a responsibilidad daytoy ti panangipasigurado tapno maisubli ditoy pagilian ni dati nga Ako Bicol Party-list Rep. Zaldy Co a wanted gapu iti maipagarup a pannakairamanna iti flood control scandal.
Daytoy ket kalpasan nga inrakurak ni Department of the Interior and Local Government (DILG) Secretary Jonvic Remulla a ti Department of Foreign Affairs ti lead agency iti panangasikaso iti panagsubli ni Co nga addan ti sumagmamano a bulan nga aglemlemmeng iti ballasiw taw.
Inbatad ni Department of Foreign Affairs spokesperson Angelica Escalona, ti panangarestar ken repatriation ken ni Co ket kasapulan ti koordinasion ti law enforcement ken judicial authorities pakairamanan ti International Criminal Police Organization (Interpol).
Kunana a daytoy ket maysa a “whole-of-government approach” ken saan laeng a nakadepende iti Department of Foreign Affairs.
Inpaganetget ti ahensia ti suportana iti rule of law ken kinasagana a mangipaay ti diplomatic assistance maiyataday iti pagannurotan.
Nagpanawagan pay ti ahensia iti publiko a mangipaay ti impormasion mainaig iti posible a paglemlemmengan ni Co.
