LAOAG CITY – Naan-anayen nga agoperar ti dialysis center iti Governor Roque Ablan Senior Memorial Hospital ditoy ciudad ti Laoag.
Segun kenni Dr. Rogelio Balbag, Hospital Executive Director ti Ilocos Norte Hospital and Management Council, nalpasen ti building nga ayan dagiti dialysis machine rason a makapagoperar daytoyen a nasayaat.
Naamoan nga adda ti 6 a machine manipod iti Department of Health ken manayonan to pay daytoy ti 2 tapnu ad-addo dagiti maipaayan da ti serbisyo.
Kabayatanna, kunana nga awan ti problema mainaig kadagiti agas pakairamanan dagiti mausar iti panag dialysis gapu ta naideliver aminen dagiti order da.
Maipalagip nga immunan nga inpakaammo ti ospital nga adda ti panagkurkurang ti agas gapu iti umad-ado a pasyente nga intunda ti panag-upgrade ti nadakamat nga ospital.
