LAOAG CITY – Kinumpirmaran ti Department of Information and Communications Technology (DICT) ken Cybercrime Investigation and Coordinating Center (CICC) nga inbabawidan ti panangipawil wenno panang-ban iti ‘messaging platform’ a Discord.
Segun ken ni Cybercrime Investigation and Coordinating Center (CICC) Executive Director Usec. Renato ‘Aboy’ Paraiso nga inbilin ti ahensia ti panangbabawi iti panang-ban ti nadakamat nga online platform.
Daytoy ket kasaruno iti nagbalin a desision kalpasan ti nagballigi a panagtaripnong nga insayangkat ti ahensia ken dagiti opisial ti Discord.
Natratar ken nagtulagan ti pannakitinnulong ti messaging platform iti gobierno tapno mapapigsa ti panangprotehir kadagiti agtutubo.
Inpettengna nga isudaa ti ‘green lane’ tapno maipalubos ti ahensia a ma-track ken ma-monitor dagiti suspicious nga aktibidad online.
Nupay kasta, nagkiddaw ti pammakawan ni Usec. Paraiso kadagiti amin a naapektaran ken naistorbo gapu iti sumagmamano nga oras a naka-ban ti platform.
Basar ken ni Department of Information and Communications Technology (DICT) Secretary Henry Rhoel Aguda a ti bilin a panang-ban ti nadakamat nga online platform ket saan a nalaka para kadakuada.
Inbatadna nga adda koneksion ti nagbalin nga addang iti ngumatngato a bilang dagiti nairekord a kaso ti NVE wenno Nihilistic Violent Extremism.
Kabayatanna, mamati ni Usec. Paraiso nga ad-adda a nalaka a mangilawlawag ti kasasaad kadagiti naapektaran ngem dagiti nagannak a naawanan ti anak mainaig kadagiti insidente.
