LAOAG CITY – Napaliiw ti Department of Information and Technology (DICT) a kellaat a bimmaba ti kaso ti text scams kalpasan nga imparit ni Presidente Ferdinand Marcos Jr. ti panag-operar ti amin a Philippine Offshore Gaming Operators (POGO) iti pagilian.
Segun kenni Department of Information and Technology Secretary Ivan John Uy, posible a dagiti kompania ti Philippine Offshore Gaming Operators ket nairaman iti text scam.
Dagiti text scam wenno mensahe a maipatulod babaen ti SMS ket kadawyan nga aglaon kadagiti peke a job offers tapno ag-scam wenno makaala iti kuarta kadagiti biktima da.
Kuna ti ahensya nga naruay latta ti text scam modus iti laksid ti naipaulog a SIM registration law.
Kabayatanna, namnamaen ti Department of Information and Technology a suportaran ida dagiti mammanday-linteg tapno maaddaanda iti kanayonan nga alikamen ken rekurso a mangsurot kadagiti kriminal a sindikato kasta met nga ad-adda a mapasayaat ti kabaelanda iti cyber defense.
