LAOAG CITY – Nangipila ti kaso ni dati nga United States President Joe Biden kontra iti United States Department of Justice (DOJ) tapno lappedan ti plano a panangiruar ti audio recordings ken transcripts ti pribado a pannakisarsaritana iti biographer daytoy idi 2016 ken 2017.
Basar iti reklamo a naipila iti federal court iti Washington D.C., naikeddeng nga iruar ti Department of Justice inton Hunio 15 dagiti nasao a materyales iti United States House Judiciary Committee ken iti conservative group nga Heritage Foundation.
Ti nasao a grupo ket nagkiddaw kadagiti dokumento kas paset ti impormasion a nausar iti imbestigasion ni dati nga Special Counsel Robert Hur idi 2023 mainaig iti panangiggem ni Biden ti classified documents.
Nailanad iti reklamo, rumrummuar nga ab-abusoen ti proseso ti kiddaw ti komite tapno maliklikan dagiti probision ti Freedom of Information Act a manglimlimitar iti pannakaiparuk-at ti nasao nga impormasion.
Kidkiddawen ti kampo ni Biden iti korte nga ideklarar kas “not valid” ken “pretextual” ti kiddaw ti komite ken naa-anay nga ipawil ti panangiruar dagiti recording.
Kabayatanna, kuna ti maysa kadagiti pannakangiwat ti Department of Justice a gagem ti ahensia nga iruar dagiti recording tapno makita ti publiko ti linaon daytoy a mangipakpakita ti kondision ti panagpanunot ti dati a Presidente.
