LAOAG CITY – Ilunglungalong ni Department of Information and Communications Technology Secretary Henry Aguda a maaddaan ti maysa a pagannurutan iti pannakaipatungpal ti ‘Good Vibes’ iti internet.
Iti kaunaan nga Executive Committee Meeting ni Sec. Aguda kas chairman ti Cybercrime Investigation and Coordinating Center (CICC), inyendorsar na ti nasao a pagannurutan a target na a masolbar ti fake news, cyber scams, ken digital threats.
Inlawlawag ni Aguda a no maaddaan ti ‘Good Vibes iti Internet’ policy ket maysa laeng iti ad-ado pay nga inisyatibo ti departamento tapno ad-adda pay a mapasayaat ken agbalin a ‘trustworthy’ ti online environment iti pagilian.
Iti maysa pay a rakurak ti departamento, ti nadakamat a pagannurutan ket nakabasar iti Cybercrime Prevention Act of 2012 no sadinno a naipalaon iti pannakabukel dagiti multi-agency task force kas pananglaban kadagiti saan nga umiso nga impormasyon a maiwarwaras iti online.
Malaksid iti fake news, trinatar pay ti sekretaryo dagiti addang ken inisyatibo ti departamento iti pangta ti cyber-terrorism.
