LAOAG CITY – Kalikagum ni Senador Joel Villanueva nga i-institutionalize ti panangipaay ti visa para kadagiti digital nomad, dagiti tattao nga agbibiahe kabayatan nga agtrabtrabaho iti adayo usar ti digital a teknolohia iti panangikagumaan ti panangpapigsa ti turismo ti pagilian.
Inbatad ni Villanueva, kadagiti napalabas a biahena kadagiti sumagmamano a tourist destination ti pagilian ken iti kallabes iti Siargao island, ti nangiduron kenkuana nga ilungalong ti Senate Bill No. 2991 a gagem nga itandudo ti baro a klase ti visa no sadinno a mapalubosan dagiti gangganaet nga agtalinaed ditoy pagilian iti naunday a panawen kabayatan nga agtrabtrabaho para iti maysa a foreign-based employer wenno business.
Basar iti World Economic Forum ken iti Nomad List, ti Pilipinas ket maikapito iti fastest growing remote work hub idi 2023.
Inrakurak ti Department of Tourism a nanayonan ti 9.15% dagiti gangganaet a bimmisita ditoy pagilian idi 2024 katukad ti 5.95 a milyon a foreign tourist a nangitunda ti record-high a P760.5 bilyon a tourism revenues.
