LAOAG CITY – Inbatad ti Department of the Interior and Local Government (DILG) nga ammo da ti lokasyon ken garaw ni Senador Ronald “Bato” dela Rosa kalpasan ti report nga adda ti arrest warrant kontra kenkuana manipod iti International Criminal Court (ICC).
Inrakurak ni Interior Secretary Jonvic Remulla a monmonitoren da ni dela Rosa ken iyur-uray da no adda ti pammilin ti korte wenno awan.
Segun ken ni Remulla, umakar-akar ti pagnanaedan ni dela Rosa babaen ti panagusar na ti nagduduma a behikulo babaen ti tulong ti sumagmamano a papagayam na.
Innayon na nga iti napalabas nga innem a lawas ket nakita ni senador dela Rosa iti innem a lokasyon.
Nagkedked metten ni Remulla a nangipublikar kadagiti lokasyon a nakakitaan ken ni dela Rosa gapu ta maikonsiderar daytoy kas confidential information.
Inpaganetget ni Remulla a saan pay nga ikonsiderar dagiti otoridad ni dela Rosa kas pugante gapu ta awan pay ti opisyal a naiparuk-at nga arrest warrant manipod iti International Criminal Court.
