LAOAG CITY – Inpakaammo ni Atty. Gerald Gallardo ti Local Government Operations Officer VII iti Department of Interior and Local Government nga idi pay laeng Marso ita a tawen ket agsagsagana dan para kadagiti mangabak nga opisyal ti Barangay ken Sangguniang Kabataan Election.
Kuna ni Gallardo a ti nasao a panagsagana da ket babaen iti panangmandar kadagiti amin a Baranggay Officials nga isimpa dan iti inventory team da.
Inlawlawag na a ti inventory team iti kada barangay ditoy probinsiya ket bukbuklen ti Brgy Chaiman, Brgy kagawad, Brgy treasurer, Brgy secretary ken maysa a representante manipod iti local government unit iti maysa nga ili wenno ciudad.
Innayon na pay a ti trabaho ti agbalin nga inventory team ket iplastar ken pagtitiponen dagiti dokumento da pakairamanan dagiti nagbalin nga imbentaryo da ken report kadagiti amin nga aktibidad da sipod ti panagtugaw da nga opisyal ti barangay agingga nga agleppas ti termino da.
Mainaig iti daytoy, inbatad ti opisyal a daytoy ket tapno masigurado nga ada iti maiturn-over kadagiti baro a mabotosan.
Innayon na a daytoy ket tapno maliklikan ti napasamak iti naglabas a brgy eleksiyon nu sadinno nga ada dagiti brgy officials dtoy probinsiya a kalpasan ti termino da ket awan iti pormal a turnover kadagiti aktibidad nga inar-aramid da a rason nu apay a saan a masinunuo dagiti sumaruno nga opisyal iti pangrugyan da.
