LAOAG CITY – Nagpanawagan ti Department of the Interior and Local Government (DILG) kadagiti local government units a paspasan da ti panangbakuna kadagiti Pilipino para ti target a 70 a porsiento iti papulasyon sakbay a malpas daytoy tawen 2021.
Kuna ni DILG spokesperson Undersecretary Jonathan Malaya a babaen ti “Vax to the Max” program, naibunongen kadagiti LGU ti 40 milyon a bakuna kontra ti COVID-19.
Inbatad na a kasapulan a maingato ti vaccination rate a mapagbalin a maysa a milyon agingga iti 1.5 milyon dagiti mabakunaan iti kada aldaw, manipud iti dati a 500 a ribo agingga iti 600 a ribo.
Inpetteng na a ti gagem ti gobyerno a mabakunaan ti first dose ti 70 a porsiento ti papulasyon sakbay ti Nobyembre 30 ken agbalin a fully vaccinated ti 70 a porsiento ti papulasyon agingga iti Disyembre 31.
Segun kenni Malaya, nakitaripnong ti DILG, Department of Health (DOH), ken National Task Force against Covid-19 kadagiti mayor iti Central Luzon, Calabarzon ken dadduma pay a priority areas ditoy pagilian tapno maipakaammo kadakuada seknan ti direktiba a darasen da ti panagbakuna.
Nagballaag met ni Malaya kadagiti mayor ken maseknan a department heads a possible nga agsungbat da gapu ti negligence wenno “unjustified failure’’ no bilang mapaay da a maiyalisto ti inoculation program a masalungasing iti Republic Act 7160 wenno Local Government Code.
