LAOAG CITY – Naikeddeng nga agturong idiay Portugal ni Department of the Interior and Local Government Secretary Jonvic Remulla tapno sukonen ti pugante a ni dati a Congressman Zaldy Co.
Inbatad ni Remulla, makitaripnong isuna kadagiti opisial ti Portugal tapno makatulong dagitoy a maisubli iti Pilipinas ni Co a birbiruken dagiti otoridad gapu iti kaso a malversation ken graft nga adda ti pakainaiganna iti ghost flood control projects.
Kunana a ni Co ket agtaltalinaed idiay Portugal basar iti intelligence-da.
Inlawlawagna a makitaripnong pay iti Philippine Center on Transnational Crime tapno maipinal ti kiddaw a makaiparuk-at ti Interpol ti red notice kontra ken ni Co.
Inpettengna nga iti agdama ket agpapada a naka-freeze dagiti sanikua ni Co pakairamanan ti Misibis Bay, Midas Casino, dua a pagtaengan iti Forbes ken dagiti balay iti Valle Verde ken Shangri-La.
Kabayatanna, kuna ni Remulla nga adda pay laeng ditoy Pilipinas ni Atong Ang nga agtultuloy met a mabirbiruk gapu iti kaso dagiti mapukpukaw a mammallot.
Naammoan a kadagiti sumaruno nga aldaw ket naikeddeng nga iberipikar ti lugar a mapapati a paglemlemmengan ni Ang.
