LAOAG CITY – Inbatad ni Department of the Interior and Local Government Secretary Jonvic Remulla nga awan ti rason tapno agkiddaw ti hospital arrest dagiti suspek para iti flood control scandal gapu ta kabaelan ti Quezon City Jail iti Payatas nga ipaay ti kasapulan dagitoy balud para iti salun-at da.
Rakurak daytoy ni Remulla kalpasan ti personal a panaginspeksyon da iti pasilidad, kadwa na da Independent Commission on Infrastructure (ICI) chair Associate Justice Andres Reyes Jr. ken ni dati a Public Works Secretary Rogelio “Babes” Singson.
Ti nasao a pagbaludan ket kabaelan na ti mangokomodar ti 200 agingga iti sangaribo nga indibidual, ken naisagana daytoy para kadagiti possible a mabalud gapu iti pannakainaig da kadagiti maanomalya a flood control projects.
Inpetteng ni Remulla a no kasapulan dagiti balud ti agdialysis ket manginstolar da ti dialysis machine, kasta met no kasapulan da ti heart monitoring equipment ket ipaay da isut gapuna a saanen a kasapulan a maikabil da iti ospital tapno isu ti temporaryo a pagtalinaedan da.
Masarakan ti nasao a pasilidad iti asideg ti Sandiganbayan.
