LAOAG CITY – Dinayaw ni Mr. Jun Arvin Gudoy, Director IV iti Public Affairs Service ti Department of Education ti Cacafean Elementary School iti ili ti Marcos bayat ti panagbisita na iti nadakamat a pagadalan.
Segun kenni Gudoy, daytoy ket gapo ta awan ti nagbalin a problema iti laksid a lima laeng dagiti mangisursuro a karaman iti pilot face to face classes.
Inbatad na nga ammo dagiti mangisursuro ti inar-aramid da tapno masigurado a natalged dagiti ubbing bayat ti kaadda da iti pagadalan.
Inlawlawag na nga awan met ti nagbalin a problema iti pilot face to face classes nangruna ket awan ti nakaptan ti covid-19 kadagiti karaman iti pilot implementation.
Kunana a naamoan na nga ado pay dagiti kayat na ti makipartisipar iti face to face classes.
Mainaig iti daytoy, iti biang met dagiti PPEs a mausar kadagiti pagadalan, inbatad ni Mr. Gudoy a malaksid iti MOOE dagitoy ket adda pay ti 100 a ribo a pisos iti kada pagadalan para iti nayun a pondo da.
Kabayatanna, kuna ni Gudoy nga ita a bulan ket ipresentar da kenni Presidente Rodrigo Duterte ti rekomendasyon ken makikoordenar da kadagiti partners da kas iti IATF, DOH, Pediatrician Society ken dadduma pay para iti manamnama a pannakaipalawa ti limited face to face classes.
