LAOAG CITY – Naragsak nga inpakaammo ni Mr. Christopher King Medina, mangidadaulo ti Persons with Disability Affairs Office ditoy ciudad ti Laoag nga awan dagiti mamonmonitor da nga establishimento a saan a mangipapaay ti diskwento kadagiti PWDs ken senior citizens.
Nupay kasta, kiniddaw na kadagiti residente nga ireport da a dagus iti opisina da no adda dagiti saan a mangipaay ti diskwento tapno insigida a masolbar.
Inlawlawag na a ti panangipaay ti diskwento ket ummuna a maikkat ti Value Added Tax (VAT) ti produkto ken serbisyo sakbay a makissay ti 20% discount.
Inbatad na a rumbeng a suruten daytoy gapo ta nakailanad daytoy iti linteg iti pagilyan a rumbeng a aipaay ti benepisyo kadagiti PWDs ken senior citizens.
Maipalagip nga inbatad ni Konsehal Jason Perera nga adda ti naawat na nga impormasyon nga adda dagiti pasdek negosyo ditoy Ilocos Norte a maipagarop a saan a mangipapaay ti usto a karbengan dagiti PWDs.
Kuna ni Perera nga imbes a 20% discount ti maipaay kadagitoy ket walo a porsiento laeng.
