LAOAG CITY – Plano ti Sangguniang Panlungsod a maiyakar ti lokasion ti Discolandia iti Barangay 1 ditoy siudad ti Laoag.
Segun ken ni Vice Mayor Rey Carlos Fariñas, mapagnunumoan iti Executive Legislative Conference no sadinno a lugar ti mabalin a pangiyakaran iti daytoy.
Inbatadna a ti Discolandia ket naaramid pay laeng idi Gobernador ti amana ditoy probinsia ken daytoy ket naipan iti maysa a lugar iti Barangay 1.
Inlawlawagna nga agarup 45 a tawen daytoyen nga adayo pay laeng iti sentro idi ngem kadagitoy a panawen ket dupudopen daytoy iti sentro ken saanen daytoy a maiyannatop iti lugar.
Kunana a dumaan payen dagiti pasdek rason a masapul a maiyakar ti ayanna tapno napinpintas ken makita ti seguridad iti tunggal maysa.
Innayonna nga iti kallabes ket maysa isuna kadagiti napan nagresponde iti napasamak nga uram iti Discolandia ket ditoy a naimatanganna ti agdama a situasion ti lugar.
Kabayatanna, inpasiguradona iti panangkitada ti long term solution para iti daytoy a banag.
