LAOAG CITY – Binigbig ti gobierno ti disinformation, misinformation ken malinformation kas maysa kadagiti seryoso a pannubok ken dakkel a karit a sangsangoen ti pagilian maipapan iti moderno nga eleksion.
Daytoy ket gapu iti makadadael a gagem dagitoy a mangperdi, agiwaras ti saan nga husto ken direkta a makaapektar iti pannakaisayangkat ti eleksion.
Inbatad ni Commission on Elections Spokesperson Director John Rex Laudiangco, ti pangta dagiti deepfakes ken AI-manipulated content ket ad-adda pay a kumarkaro ken agbalbalin a napeggad para iti umas-asideg nga eleksion.
Mabalin nga usaren dagiti peke a video ken linaon nga aramid ti artificial intelligence tapno allilawen ti publiko ken diktaran ti opinyon dagiti botante.
Makitintinnulong ti Commission on Elections kadagiti nagduduma nga organisasion ti media ken dagiti technology company tapno ikkaten ken solbaren dagiti dummy accounts ken fake accounts nga agiwarwaras ti disinformation online.
Malaksid iti daytoy, ti Commission on Elections ket makikokoordinar ken makisarsarita iti Kongreso tapno mangilungalong ken mangbukel ti ad-adda a nabarbaro a linteg nga addaan ti gagem tapno labanan ti disinformation ken pagsungbaten dagiti responsable iti panagwaras daytoy.
Innayon pay ni Laudiangco, ti pananglaban iti fake news ken saan nga husto nga impormasion ket saan laeng a responsibilidad ti gobierno wenno ti Commission on Elections no diket responsibilidad iti tunggal maysa.
