LAOAG CITY – Nagballaag dagiti sumagmamano a senador no saan pay a matuloy ti umuna a parliament election ti Bangsamoro Autonomous Region in Muslim Mindanao (BARMM).
Iti panagdengngeg ti Senado, inpetteng ni Senador Migz Zubiri a namin-adun a daras a naitantan ti eleksion iti Bangsamoro Autonomous Region in Muslim Mindanao.
Inbatad met ni Senador JV Ejercito a pito a tawenen nga iyur-uray dagiti taga Bangsamoro Autonomous Region in Muslim Mindanao iti panangisayangkat ti eleksion iti rehionda.
Ballaag ni Zubiri, no saan latta a matuloy ti eleksion ti Bangsamoro Autonomous Region in Muslim Mindanao ti namnamaen ti kinaranggas ken riribuk iti political uncertainty ken maibilang a disenfranchisement ti pannakaipaidam kadagiti residente nga agbutos iti kayatda a lider.
Para ken ni Commission on Elections (COMELEC) Chairman George Erwin Garcia, inton bulan ti Setiembre ti “best” ken umno a gundaway para iti Bangsamoro Autonomous Region in Muslim Mindanao Elections.
Nupay kasta, adalen pay daytoy gapu ta saan met a mabukel ti tallo a tawen a termino ti maelektaran no mangiwayat manen ti eleksion iti rehion inton 2028.
