LAOAG CITY – Inlungalong ti gobierno ti otomatiko a panag-enroll ti amin a Pantawid Pamilyang Pilipino Program (4Ps) beneficiaries tapno maipasigurado a makaalada ti diskuento iti kuriente.
Inbatad ni Department of Energy (DOE) Undersecretary Mylene Capongcol, maiyallubog daytoy iti pammilin ni Presidente Ferdinand Marcos Jr. tapno ad-adu a marigrigat a pamilia ti matulungan iti electric bill-da.
Iti agdama, agduduma ti lifeline discount iti kada power company nga adda ti agingga iti 50% laeng ngem iti Manila Electric Railroad and Light Company (MERALCO), addaan ti 100% discount ngem nakadepende iti konsumo.
Iti gakat, saanen a kasapulan ti papeles dagiti Pantawid Pamilyang Pilipino Program wenno 4Ps members basta adda iti opisial a listaan ti Department of Social Welfare and Development (DSWD), otomatiko a kualipikado dagitoy iti subsidy.
Inpasigurado ti Department of Energy a liplippasendan ti data-sharing kaduana ti Department of Social Welfare and Development ken Energy Regulatory Commission (ERC) tapno agpapada ken napaspaspas ti panangipaay ti benepisio.
