LAOAG CITY – Ginutigot ti Social Security System (SSS) dagiti household employers nga irehistro dagiti katulongda tapno masigurado nga isuda ket sakup ti social security protection ti gobierno.
Inbatad ni Social Security System President ken CEO Robert Joseph de Claro, gagem ti Kasambahay Caravan a naisayangkat iti Metro Manila ken Rizal a maiyasideg ti SSS services kadagiti household workers ken dagiti employers dagitoy.
Kunana a dagiti rehistrado a kasambahay ket mabalin nga agaplikar iti SSS loan programs pakairamanan ti salary ken calamity loans ken makaala met ti proteksion manipud iti Employees’ Compensation Program para iti work-related sickness, disability wenno death.
Inlawlawag ni Social Security System NCR Operations Group Acting SVP Benjamin Dolindo Jr., gagem ti caravan a papigsaen pay ti social security coverage para iti sektor ti domestic help.
