LAOAG CITY – Nakasangpeten ditoy Pilipinas ni dismissed Bamban, Tarlac Mayor Alice Guo kalpasan ti pannakakemmegna idiay Indonesia.
Kadwa ni Guo da Interior Sec. Benhur Abalos ken ni Philippine National Police Chief Rommel Marbil, pakiramanan dagiti kameng ti Bureau of Investigation.
Agala-una itay parbangon ket nagdisso ti nagluganan ni Guo a private plane.
Maipalagip a Mayo 22, 2024, idi naudi a nakita ditoy Pilipinas ti dati a Mayor apaman ti isasango na idi iti Senado ukol para iti imbestigasyon iti na-raid a Philippine Offshore Gaming Operators wenno POGO hub, no sadinno nga iti umuna a lawas ti Hulyo ket nasuspenso isunan a ks Mayor iti Bamban, Tarlac.
Kalpasan iti daytoy ket naglibas ni Guo, kadwa na da Wesley Guo, Shiela Guo ken Casandra Ong.
Idi Hulyo 18, 2024, nakadanon dagitoy idiay Kuala Lumpur, Malaysia, idinto nga Hulyo 21, 2024 idi nag-flight da nga agturong idiay Singapore.
Naamuan nga Agosto 18, 2024 idi timmalaw da idiay Singapore ken nagturong da iti Batam, Indonesia, no sadinno nga Agosto 19 idi inyanunsyo ni Sen. Risa Hontiveros ti impormasyon nga awanen ditoy pagilyan ni Guo.
Insigida met a nakemmeg da Shiela ken Casandra idiay Batam idi Agosto 20, 2024 ken idi laeng Setyembre 3, 2024 ket balligi a naarestar dagiti Indonesian authorities ni Alice Guo idiay Tangerang.
Iti agdama, nagtalinaed ni Guo iti kustodiar ti Philippine National Police sakbay a sumango iti arrest order ti Senado.
Kabayatanna, inpakaammu met ni Guo nga adda pangta ti biag na rason no apay a timmalaw isuna ditoy pagilyan.
