LAOAG CITY – Possible a “Bagman” wenno “Legman” dagiti dadakkel a kontratista dagiti District Engineers ti Department of Public Works and Highways (DPWH).
Daytoy ti inpetteng ni Senador Ping Lacson kalpasan a naibutaktak ti gandat a pannakapasuksuk ken ni Batangas 1st District Representative Leandro Leviste mainaig ti maanomalya nga infrastructure project iti probinsya.
Inpalgak ti senador a saan a normal a mismo a ti district engineer ti mangidiaya ti pasuksuk ken imbes ket masansan nga aggapgapo daytoy iti kontratista.
Gapu iti daytoy, kuna ni Lacson a napateg a maaddaan ti naun-uneg nga imbestigasyon tapno maamoan no siasinno ti pudno nga adda iti likudan ti gandat a pannakaipaay ti pasuksuk ken ni Leviste.
Innayon ni Lacson a kasapulan ti “surgical solution” iti sistematiko a korapsyon iti Department of Public Works and Highways, imbes a simple a panangsukat wenno panang-reassign kadagiti opisyal.
Inpaganetget pay ni Lacson a masapol a mangiyuswat ti naiget nga imbestigasyon ti Philippine National Police Criminal Investigation and Detection Group wenno uray ti National Bureau of Investigation, ken saan a rumbeng nga agsardeng ti panangipila ti kaso kontra ken ni Batangas 1st District Engineer Abelardo Calalo.
Inaprisyar met ti senador iti panagkedked ni Leviste iti naidiaya kenkuana a pasuksuk manipod iti kunniber a district engineer ti Department of Public Works and Highways.
Mangnamnama ti senador a maikkan ti gundaway a personal a makablaawan ken pagyamanan ni Leviste.
